کیوں امیروں سے مرا گھر نہیں دیکھا جاتا

کیوں امیروں سے مرا گھر نہیں دیکھا جاتا

میرے گھر پر پڑا چھپر نہیں دیکھا جاتا

اپنے ہاتھوں میں تو شمشیر اٹھا رکھی ہے

اوروں کے ہاتھ میں پتھر نہیں دیکھا جاتا

خود سے اوپر اسے دیکھیں گے بھلا ہم کیسے

اپنے بھائی کو برابر نہیں دیکھا جاتا

ہاتھ بھی رکھتا نہیں جن کے سروں پر کوئی

ایسے بچوں کا مقدر نہیں دیکھا جاتا

مار دیں اس کو یا پھر خود ہی فنا ہو جائیں

ہم سے اب کوئی ستمگر نہیں دیکھا جاتا

زندگی بھر وہ کنارے پہ کھڑے رہتے ہیں

جن سے بے باک سمندر نہیں دیکھا جاتا

ہم نے آنکھوں پہ امیری کا لگایا چشمہ

ہم سے اب کوئی بھی کمتر نہیں دیکھا جاتا

بعد مرنے کے جو آئیں گے مناظر عاطفؔ

کیوں انہیں پہلے ہی مر کر نہیں دیکھا جاتا