kyon amiron se mera ghar nahin dekha jata

kyoñ amīroñ se mirā ghar nahīñ dekhā jaatā

mere ghar par paḌā chhappar nahīñ dekhā jaatā

apne hāthoñ meñ to shamshīr uThā rakkhī hai

auroñ ke haath meñ patthar nahīñ dekhā jaatā

ḳhud se uupar use dekheñge bhalā ham kaise

apne bhaa.ī ko barābar nahīñ dekhā jaatā

haath bhī rakhtā nahīñ jin ke saroñ par koī

aise bachchoñ kā muqaddar nahīñ dekhā jaatā

maar deñ us ko yā phir ḳhud hī fanā ho jaa.eñ

ham se ab koī sitamgar nahīñ dekhā jaatā

zindagī bhar vo kināre pe khaḌe rahte haiñ

jin se bebāk samundar nahīñ dekhā jaatā

ham ne āñkhoñ pe amīrī kā lagāyā chashma

ham se ab koī bhī kamtar nahīñ dekhā jaatā

baa'd marne ke jo ā.eñge manāzir 'ātif'

kyoñ unheñ pahle hī mar kar nahīñ dekhā jaatā

kyon amiron se mera ghar nahin dekha jata

mere ghar par paDa chhappar nahin dekha jata

apne hathon mein to shamshir uTha rakkhi hai

auron ke hath mein patthar nahin dekha jata

KHud se upar use dekhenge bhala hum kaise

apne bhai ko barabar nahin dekha jata

hath bhi rakhta nahin jin ke saron par koi

aise bachchon ka muqaddar nahin dekha jata

mar den us ko ya phir KHud hi fana ho jaen

hum se ab koi sitamgar nahin dekha jata

zindagi bhar wo kinare pe khaDe rahte hain

jin se bebak samundar nahin dekha jata

hum ne aankhon pe amiri ka lagaya chashma

hum se ab koi bhi kamtar nahin dekha jata

ba'd marne ke jo aaenge manazir 'atif'

kyon unhen pahle hi mar kar nahin dekha jata