kyon bayaban bayaban bhaTakta phira kyon pareshan raha gham-gazida raha

kyoñ bayābāñ bayābāñ bhaTaktā phirā kyoñ pareshāñ rahā ġham-gazīda rahā

aaj ik naujavāñ mujh se kahne lagā qais pāgal thā dāman-darīda rahā

merī rāhoñ meñ gumnām galiyāñ bhī thiiñ qasr-e-yārāñ bhī thā shahr-e-aġhyār bhī

maiñ kisī āstāne kā patthar na thā bū-e-gul thā ki har sū parīda rahā

jaane kitne musāfir yahāñ aa.e haiñ an-ginat naam haiñ saqf o mehrāb par

ik purānī imārat ke saa.e tale maiñ bahut der tak āb-dīda rahā

ajnabī ban ke rātoñ kī tanhā.ī meñ mujh se merā pata pūchhte hī rahe

ye mire lab jo barsoñ muqaffal rahe ye mirā sar jo sadiyoñ ḳhamīda rahā

tum kitāboñ meñ mahfūz kar lo mujhe kyā ajab hai koī paḌhne vaalā mile

maiñ vo āvāz huuñ jis kā sāme.a nahīñ maiñ vo lahja huuñ jo nā-shunīda rahā

kyon bayaban bayaban bhaTakta phira kyon pareshan raha gham-gazida raha

aaj ek naujawan mujh se kahne laga qais pagal tha daman-darida raha

meri rahon mein gumnam galiyan bhi thin qasr-e-yaran bhi tha shahr-e-aghyar bhi

main kisi aastane ka patthar na tha bu-e-gul tha ki har su parida raha

jaane kitne musafir yahan aae hain an-ginat nam hain saqf o mehrab par

ek purani imarat ke sae tale main bahut der tak aab-dida raha

ajnabi ban ke raaton ki tanhai mein mujh se mera pata puchhte hi rahe

ye mere lab jo barson muqaffal rahe ye mera sar jo sadiyon KHamida raha

tum kitabon mein mahfuz kar lo mujhe kya ajab hai koi paDhne wala mile

main wo aawaz hun jis ka samea nahin main wo lahja hun jo na-shunida raha