kyon bhala chilman ko sarkane pe wo mail nahin

kyoñ bhalā chilman ko sarkāne pe vo maa.il nahīñ

kaun sā dariyā hai vo jis kā koī sāhil nahīñ

dar-haqīqat hai yahī me.arāj-e-ishq-o-āshiqī

mere us ke darmiyāñ ab koī bhī haa.il nahīñ

us kī shamshīr-e-nazar ne chaak kar Daalā jigar

bevafā hote hue lagtā hai vo buzdil nahīñ

paḌh liyā āñkhoñ ke ḳhāme se likhī tahrīr ko

maslak-e-ushshāq shāhid hai ki maiñ jāhil nahīñ

ishq ke chehre pe badnāmī kā ġhāza mal diyā

koī chādar koī parda koī bhī mahmil nahīñ

qabl-az-rusvā.ī is ahqar se kar lete savāl

zāhiran to saḳht huuñ lekin maiñ patthar-dil nahīñ

ban sake jo aap ke maġhrūr māthe kā tilak

kyā hamāre ḳhuun kī surḳhī bhī is qābil nahīñ

merī ġhurbat dekh kar patthar bhī ḳhuuñ royā kiye

jab ki be-jānoñ ke sīnoñ meñ koī bhī dil nahīñ

koī naala koī girya koī aañsū koī aah

koī fariyād-e-alam-añgez lā-hāsil nahīñ

huuñ tanīn-e-ishq kī vaadī meñ misl-e-gum-shuda

yād-e-yārāñ se mubarrā koī sī mahfil nahīñ

dar-ba-dar qarya-ba-qarya kū-ba-kū dīvāna-vār

har jagah DhūñDā use lekin koī hāsil nahīñ

ḳhastagī se sar jhukā kar qalb meñ jab kī nazar

tab lagā us zaat se ik lamha ḳhālī dil nahīñ

mustaqil maiñ kar rahā huuñ ātishī dariyā ubuur

qasd-e-mohkam ho to koī kaam bhī mushkil nahīñ

ai 'falak' maiñ ne jalā Daalī haiñ saarī kashtiyāñ

kyūñki is manzil se aage koī bhī manzil nahīñ

kyon bhala chilman ko sarkane pe wo mail nahin

kaun sa dariya hai wo jis ka koi sahil nahin

dar-haqiqat hai yahi mearaj-e-ishq-o-ashiqi

mere us ke darmiyan ab koi bhi hail nahin

us ki shamshir-e-nazar ne chaak kar Dala jigar

bewafa hote hue lagta hai wo buzdil nahin

paDh liya aankhon ke KHame se likhi tahrir ko

maslak-e-ushshaq shahid hai ki main jahil nahin

ishq ke chehre pe badnami ka ghaza mal diya

koi chadar koi parda koi bhi mahmil nahin

qabl-az-ruswai is ahqar se kar lete sawal

zahiran to saKHt hun lekin main patthar-dil nahin

ban sake jo aap ke maghrur mathe ka tilak

kya hamare KHun ki surKHi bhi is qabil nahin

meri ghurbat dekh kar patthar bhi KHun roya kiye

jab ki be-jaanon ke sinon mein koi bhi dil nahin

koi nala koi girya koi aansu koi aah

koi fariyaad-e-alam-angez la-hasil nahin

hun tanin-e-ishq ki wadi mein misl-e-gum-shuda

yaad-e-yaran se mubarra koi si mahfil nahin

dar-ba-dar qarya-ba-qarya ku-ba-ku diwana-war

har jagah DhunDa use lekin koi hasil nahin

KHastagi se sar jhuka kar qalb mein jab ki nazar

tab laga us zat se ek lamha KHali dil nahin

mustaqil main kar raha hun aatishi dariya ubur

qasd-e-mohkam ho to koi kaam bhi mushkil nahin

ai 'falak' main ne jala Dali hain sari kashtiyan

kyunki is manzil se aage koi bhi manzil nahin