kyon dilon ka sukun luTa aaKHir

kyoñ diloñ kā sukūñ luTā āḳhir

log kyā kar ga.e ḳhatā āḳhir

ho gayā vo bhī bevafā āḳhir

jis kā Dar thā vahī huā āḳhir

jaane vaalī sadī se pūchhe kaun

ḳhuun kyoñ is qadar bahā āḳhir

kyoñ nigāheñ badal ga.iiñ terī

kyā ḳhatā maiñ ne kī batā āḳhir

vaqt-e-āḳhir ye diin kī bāteñ

yaad aayā unheñ ḳhudā āḳhir

dil-e-ḳhāna-ḳharāb ke hāthoñ

zindagī ban ga.ī sazā āḳhir

dard-e-dil kā bahut ilaaj kiyā

ye maraz niklā lā-davā āḳhir

maiñ ne jis par bhī e.atibār kiyā

haif vo de gayā daġhā āḳhir

ham-safar us kā saath chhoḌ ga.e

'nāz' tanhā hī rah gayā āḳhir

kyon dilon ka sukun luTa aaKHir

log kya kar gae KHata aaKHir

ho gaya wo bhi bewafa aaKHir

jis ka Dar tha wahi hua aaKHir

jaane wali sadi se puchhe kaun

KHun kyon is qadar baha aaKHir

kyon nigahen badal gain teri

kya KHata main ne ki bata aaKHir

waqt-e-aKHir ye din ki baaten

yaad aaya unhen KHuda aaKHir

dil-e-KHana-KHarab ke hathon

zindagi ban gai saza aaKHir

dard-e-dil ka bahut ilaj kiya

ye maraz nikla la-dawa aaKHir

main ne jis par bhi eatibar kiya

haif wo de gaya dagha aaKHir

ham-safar us ka sath chhoD gae

'naz' tanha hi rah gaya aaKHir