kyon hain wo tegh-ba-kaf aur KHafa kya jaane

kyoñ haiñ vo teġh-ba-kaf aur ḳhafā kyā jaane

aaj kis shaḳhs kī aa.ī hai qazā kyā jaane

terā bīmār-e-ġham-e-hijr shifā kyā jaane

kaisī hotī hai davā aur duā kyā jaane

ham se pūchho hameñ ma.alūm hai ham jānte haiñ

ġhair kam-baḳht mohabbat kā mazā kyā jaane

duur ho paas se kambaḳht tabīb-e-nādāñ

tū bhalā dard-e-mohabbat kī davā kyā jaane

pūchhā jab maiñ ne ki ai jaan mirā dil hai kahāñ

ban ke anjān sitamgar ne kahā kyā jaane

mai-e-angūr kī kartā hai mazammat vaa.iz

us kī lazzat ko tū ai mard-e-ḳhudā kyā jaane

bulbul-e-zār hai muddat se asīr-e-sayyād

āj-kal kaisī hai gulshan kī havā kyā jaane

ai dil-e-zār abas un se hai ummīd-e-vafā

jo jafā-pesha ho zālim ho vafā kyā jaane

yaar kamsin bhī hai nādān bhī hai ai 'sābir'

vo abhī dil ke lubhāne kī adā kyā jaane

kyon hain wo tegh-ba-kaf aur KHafa kya jaane

aaj kis shaKHs ki aai hai qaza kya jaane

tera bimar-e-gham-e-hijr shifa kya jaane

kaisi hoti hai dawa aur dua kya jaane

hum se puchho hamein malum hai hum jaante hain

ghair kam-baKHt mohabbat ka maza kya jaane

dur ho pas se kambaKHt tabib-e-nadan

tu bhala dard-e-mohabbat ki dawa kya jaane

puchha jab main ne ki ai jaan mera dil hai kahan

ban ke anjaan sitamgar ne kaha kya jaane

mai-e-angur ki karta hai mazammat waiz

us ki lazzat ko tu ai mard-e-KHuda kya jaane

bulbul-e-zar hai muddat se asir-e-sayyaad

aaj-kal kaisi hai gulshan ki hawa kya jaane

ai dil-e-zar abas un se hai ummid-e-wafa

jo jafa-pesha ho zalim ho wafa kya jaane

yar kamsin bhi hai nadan bhi hai ai 'sabir'

wo abhi dil ke lubhane ki ada kya jaane