kyon ho gae haqir KHud apni nigah mein

kyoñ ho ga.e haqīr ḳhud apnī nigāh meñ

kyā dekh aa.e ham ye tirī jalva-gāh meñ

kyā kyā gumāñ haiñ ham pe hamārī nigāh ko

ham jab se aa base haiñ tumhārī nigāh meñ

ḳhud husn se bhī bach ke guzarnā paḌā jahāñ

aa.e vo marhale bhī mohabbat kī raah meñ

ye kin bulandiyoñ kā tajassus nazar ko hai

lagtā nahīñ dil anjuman-e-mehr-o-māh meñ

miT hī chuke the razm-gah-e-zindagī meñ ham

qismat se aa ga.e tire ġham kī panāh meñ

tum ne mujhe banā ke gunāhgār-e-ārzū

bhar dī haiñ jannateñ mire zauq-e-gunāh meñ

tamhīd-e-shauq kī bhī shikāyat laboñ pe hai

takmīl-e-shauq ke bhī taqāze nigāh meñ

karte shikāyat-e-sitam-e-be-hisāb kyā

ham kho ke rah ga.e karam-e-gāh-gāh meñ

ye kyā ḳhayāl hai tujhe ai qalb-e-nā-murād

koī sharīk ho tire hāl-e-tabāh meñ

'maḳhmūr' shām-e-ġham kī fazā.eñ sulag uThīñ

kis ātish-e-nihāñ ke sharāre the aah meñ

kyon ho gae haqir KHud apni nigah mein

kya dekh aae hum ye teri jalwa-gah mein

kya kya guman hain hum pe hamari nigah ko

hum jab se aa base hain tumhaari nigah mein

KHud husn se bhi bach ke guzarna paDa jahan

aae wo marhale bhi mohabbat ki rah mein

ye kin bulandiyon ka tajassus nazar ko hai

lagta nahin dil anjuman-e-mehr-o-mah mein

miT hi chuke the razm-gah-e-zindagi mein hum

qismat se aa gae tere gham ki panah mein

tum ne mujhe bana ke gunahgar-e-arzu

bhar di hain jannaten mere zauq-e-gunah mein

tamhid-e-shauq ki bhi shikayat labon pe hai

takmil-e-shauq ke bhi taqaze nigah mein

karte shikayat-e-sitam-e-be-hisab kya

hum kho ke rah gae karam-e-gah-gah mein

ye kya KHayal hai tujhe ai qalb-e-na-murad

koi sharik ho tere haal-e-tabah mein

'maKHmur' sham-e-gham ki fazaen sulag uThin

kis aatish-e-nihan ke sharare the aah mein