کیوں لے آئے سر بازار سنو اے لوگو

کیوں لے آئے سر بازار سنو اے لوگو

میں نہ فنکار نہ شہکار سنو اے لوگو

ٹوٹتے حرفوں کا نوحہ ہوں لبوں پر چن لو

اک صدا کا ہوں طلب گار سنو اے لوگو

ہر تعارف پہ نہیں جھکتی نگاہ تسلیم

آنکھ ہوتی ہے سمجھ دار سنو اے لوگو

اک سیہ بخت چمک کر جہاں بجھ جائے گا

کوئی ہو جائے گا بیدار سنو اے لوگو

میں کہ خوش ہوں مجھے دوری کا نہ احساس دلاؤ

کیوں اٹھاتے ہو یہ دیوار سنو اے لوگو

سوکھے زخموں کے چٹکنے کی صدا بھی انمول

دل سے بڑھ کر نہیں فنکار سنو اے لوگو