کیوں میری وحشتوں کو تماشہ کرے کوئی

کیوں میری وحشتوں کو تماشہ کرے کوئی

آئینہ میں نہیں ہوں کہ دیکھا کرے کوئی

ہر ہر نگاہ اس کی بیاباں نورد ہے

اک دشت اپنے دل میں جو پیدا کرے کوئی

کھنچ کر اب آ گیا ہے نگاہوں میں سوز دل

فکر نقاب عارض زیبا کرے کوئی

اک ضبط بے محل نے بھرم دل کا رکھ لیا

سو گونا ہے جو آج سے نالہ کرے کوئی

نادان کچھ تو ہوتی ہے تکلیف ہجر میں

کچھ شوق تو نہیں ہے کہ رویا کرے کوئی

افسانۂ کلیم پہ ایمان ہے مرا

اس شوق کو منیرؔ مگر کیا کرے کوئی