کیوں مرے بعد مرے واسطے گریہ کیجے

کیوں مرے بعد مرے واسطے گریہ کیجے

کچی دیوار تھی خود بیٹھ گئی کیا کیجے

آپ کی بزم میں بیٹھا ہوں میں غیروں کی طرح

قد مرا پست سہی دل تو نہ چھوٹا کیجے

آتش گل کبھی دامن بھی جلا دیتی ہے

دیکھنا ہو تو انہیں دور سے دیکھا کیجے

آ رہے ہیں وہ پس مرگ مسیحائی کو

کاش کہہ دے کوئی اس لاش کو زندہ کیجے

دل کی تسکین کا سامان بھی ہو جائے گا

جوہر خنجر قاتل پہ بھروسہ کیجے

بادہ نوشی سے ہمیں باز نہ آئے یارو

دل تو ہر سانس پہ کہتا رہا توبہ کیجے

عظمت ارض وطن پوچھئے ہم سے شاداںؔ

دل یہ کہتا ہے کہ ہر گام پہ سجدہ کیجے