kyon mere baad mere waste girya kije

kyoñ mire baad mire vāste girya kiije

kachchī dīvār thī ḳhud baiTh ga.ī kyā kiije

aap kī bazm meñ baiThā huuñ maiñ ġhairoñ kī tarah

qad mirā past sahī dil to na chhoTā kiije

ātish-e-gul kabhī dāman bhī jalā detī hai

dekhnā ho to unheñ duur se dekhā kiije

aa rahe haiñ vo pas-e-marg masīhā.ī ko

kaash kah de koī is laash ko zinda kiije

dil kī taskīn kā sāmān bhī ho jā.egā

jauhar-e-ḳhanjar-e-qātil pe bharosa kiije

bāda-noshī se hamīñ baaz na aa.e yaaro

dil to har saañs pe kahtā rahā tauba kiije

azmat-e-arz-e-vatan pūchhiye ham se 'shādāñ'

dil ye kahtā hai ki har-gām pe sajda kiije

kyon mere baad mere waste girya kije

kachchi diwar thi KHud baiTh gai kya kije

aap ki bazm mein baiTha hun main ghairon ki tarah

qad mera past sahi dil to na chhoTa kije

aatish-e-gul kabhi daman bhi jala deti hai

dekhna ho to unhen dur se dekha kije

aa rahe hain wo pas-e-marg masihai ko

kash kah de koi is lash ko zinda kije

dil ki taskin ka saman bhi ho jaega

jauhar-e-KHanjar-e-qatil pe bharosa kije

baada-noshi se hamin baz na aae yaro

dil to har sans pe kahta raha tauba kije

azmat-e-arz-e-watan puchhiye hum se 'shadan'

dil ye kahta hai ki har-gam pe sajda kije