kyon musibat mein hun masrur tujhe kya malum

kyoñ musībat meñ huuñ masrūr tujhe kyā mālūm

kyā mohabbat ke haiñ dastūr tujhe kyā mālūm

fitrat-e-husn hai ye ye hai taqāzā-e-shabāb

tū hai kis vāste maġhrūr tujhe kyā mālūm

bāġhbāñ kab kī bahār aa.ī bhī ruḳhsat bhī huī

maiñ qafas meñ huuñ ba-dastūr tujhe kyā mālūm

gardish-e-chashm kī lazzat koī mujh se pūchhe

vaar ochhā hai ki bharpūr tujhe kyā mālūm

na burā maan nasheman ke banāne vaale

barq aadat se hai majbūr tujhe kyā mālūm

saath degā tū kahāñ tak mirī barbādī kā

merī manzil hai bahut duur tujhe kyā mālūm

kyoñ nigāhoñ se hai is darja pareshān 'sa.īd'

yahī rahmat ko hai manzūr tujhe kyā ma.alūm

kyon musibat mein hun masrur tujhe kya malum

kya mohabbat ke hain dastur tujhe kya malum

fitrat-e-husn hai ye ye hai taqaza-e-shabab

tu hai kis waste maghrur tujhe kya malum

baghban kab ki bahaar aai bhi ruKHsat bhi hui

main qafas mein hun ba-dastur tujhe kya malum

gardish-e-chashm ki lazzat koi mujh se puchhe

war ochha hai ki bharpur tujhe kya malum

na bura man nasheman ke banane wale

barq aadat se hai majbur tujhe kya malum

sath dega tu kahan tak meri barbaadi ka

meri manzil hai bahut dur tujhe kya malum

kyon nigahon se hai is darja pareshan 'said'

yahi rahmat ko hai manzur tujhe kya malum