kyon na qurban main hun is takrar par

kyoñ na qurbāñ maiñ huuñ is takrār par

pyaar aatā hai tire inkār par

naaz be-jā hai abhī guftār par

faisla baaqī hai jab kirdār par

baam par shāyad vo aa.eñ be-naqāb

chashm-e-hasrat hai dar-o-dīvār par

har kalī hotī hai sadqe sub.h-o-shām

tere gesū aur tire ruḳhsār par

ḳhuun se maiñ ne bhī sīñchā hai chaman

haq hai merā bhī gul-o-gulzār par

ishq meñ dair-o-haram ko bhuul jā

sar jhukā de āstān-e-yār par

ham vafādārī kī ḳhātir mar-miTe

yaar kā lutf-o-karam aġhyār par

husn ke hāthoñ meñ aa.ī shāḳh-e-gul

ishq kī nazreñ rahīñ talvār par

chehra-e-nāhīd-o-parvīñ munfa.il

hai nazar ek matla-e-anvār par

zaḳhm 'aslam' phir hare hone lage

hai masīhā kā karam bīmār par

kyon na qurban main hun is takrar par

pyar aata hai tere inkar par

naz be-ja hai abhi guftar par

faisla baqi hai jab kirdar par

baam par shayad wo aaen be-naqab

chashm-e-hasrat hai dar-o-diwar par

har kali hoti hai sadqe subh-o-sham

tere gesu aur tere ruKHsar par

KHun se main ne bhi sincha hai chaman

haq hai mera bhi gul-o-gulzar par

ishq mein dair-o-haram ko bhul ja

sar jhuka de aastan-e-yar par

hum wafadari ki KHatir mar-miTe

yar ka lutf-o-karam aghyar par

husn ke hathon mein aai shaKH-e-gul

ishq ki nazren rahin talwar par

chehra-e-nahid-o-parwin munfail

hai nazar ek matla-e-anwar par

zaKHm 'aslam' phir hare hone lage

hai masiha ka karam bimar par