کیوں نہ رنگیں ہو داستاں میری

کیوں نہ رنگیں ہو داستاں میری

ذکر ان کا ہے اور زباں میری

حسن اپنی شکست مان گیا

آفریں سعیٔ رائیگاں میری

سیکڑوں حشر کے برابر ہے

اک تمنا ہے جاں نشیں میری

اڑ گیا رنگ ان کے عارض کا

لب تک آئی نہ تھی فغاں میری

کیوں سناؤں کسی کو میں آخر

ان کا قصہ ہے داستاں میری

وہ سمائے ہوئے ہیں رگ رگ میں

ہر ادا اب ہے دلستاں میری

راہ دشوار خود سبق دے گی

نہ سنیں اہل کارواں میری

ہر کلی گلستاں نظر آتی

قدر کرتا جو باغباں میری

وجد طاری ہے اہل دل پہ بشیرؔ

حاصل عشق ہے اذاں میری