kyon na rangin ho dastan meri

kyoñ na rangīñ ho dāstāñ merī

zikr un kā hai aur zabāñ merī

husn apnī shikast maan gayā

āfrīñ sa.ī-e-rā.egāñ merī

saikḌoñ hashr ke barābar hai

ik tamannā hai jāñ-nashīñ merī

uḌ gayā rang un ke 'āriz kā

lab tak aa.ī na thī fuġhāñ merī

kyoñ sunā.ūñ kisī ko maiñ āḳhir

un kā qissa hai dāstāñ merī

vo samā.e hue haiñ rag rag meñ

har adā ab hai dilsitāñ merī

rāh-e-dushvār ḳhud sabaq degī

na suneñ ahl-e-kārvāñ merī

har kalī gulsitāñ nazar aatī

qadr kartā jo bāġhbāñ merī

vajd taarī hai ahl-e-dil pe 'bashīr'

hāsil-e-ishq hai azaañ merī

kyon na rangin ho dastan meri

zikr un ka hai aur zaban meri

husn apni shikast man gaya

aafrin sai-e-raegan meri

saikDon hashr ke barabar hai

ek tamanna hai jaan-nashin meri

uD gaya rang un ke 'ariz ka

lab tak aai na thi fughan meri

kyon sunaun kisi ko main aaKHir

un ka qissa hai dastan meri

wo samae hue hain rag rag mein

har ada ab hai dilsitan meri

rah-e-dushwar KHud sabaq degi

na sunen ahl-e-karwan meri

har kali gulsitan nazar aati

qadr karta jo baghban meri

wajd tari hai ahl-e-dil pe 'bashir'

hasil-e-ishq hai azan meri