کیوں روئیے جو نالۂ دل نارسا ہوا

کیوں روئیے جو نالۂ دل نارسا ہوا

یہ سوچئے کہ جذب محبت کو کیا ہوا

صورت یہ ہے کہ مجھ میں وہ جلوہ نما ہوا

حیرت یہ ہے کہ میری نگاہوں کو کیا ہوا

پورا تقاضۂ خلش مدعا ہوا

جب جان دی تو فرض محبت ادا ہوا

شامل ہے قید عشق میں آزادیوں کی روح

اب کیا کہوں اسیر ہوا یا رہا ہوا

قیدی سہی جنون تمنا کو کیا کروں

پھرتا ہوں اپنے دل میں تمہیں ڈھونڈھتا ہوا

دل میں سوائے حسرت پامال کچھ نہیں

اس گھر میں اک چراغ ہے وہ بھی بجھا ہوا

ساقی یہ تیرا شاہدؔ مخمور تو نہیں

آتا ہے میکدے میں کوئی جھومتا ہوا