kyon roiye jo nala-e-dil-e-na-rasa hua

kyoñ roiye jo nāla-e-dil-e-nā-rasā huā

ye sochiye ki jazb-e-mohabbat ko kyā huā

sūrat ye hai ki mujh meñ vo jalva-numā huā

hairat ye hai ki merī nigāhoñ ko kyā huā

puurā taqāza-e-ḳhalish-e-mudda.ā huā

jab jaan dī to farz-e-mohabbat adā huā

shāmil hai qaid-e-ishq meñ āzadiyoñ kī ruuh

ab kyā kahūñ asiir huā yā rihā huā

qaidī sahī junūn-e-tamannā ko kyā karūñ

phirtā huuñ apne dil meñ tumheñ DhūñDhtā huā

dil meñ sivā.e hasrat-e-pāmāl kuchh nahīñ

is ghar meñ ik charāġh hai vo bhī bujhā huā

saaqī ye terā ‘shāhid’-e-maḳhmūr to nahīñ

aatā hai mai-kade meñ koī jhūmtā huā

kyon roiye jo nala-e-dil-e-na-rasa hua

ye sochiye ki jazb-e-mohabbat ko kya hua

surat ye hai ki mujh mein wo jalwa-numa hua

hairat ye hai ki meri nigahon ko kya hua

pura taqaza-e-KHalish-e-muddaa hua

jab jaan di to farz-e-mohabbat ada hua

shamil hai qaid-e-ishq mein aazadiyon ki ruh

ab kya kahun asir hua ya riha hua

qaidi sahi junun-e-tamanna ko kya karun

phirta hun apne dil mein tumhein DhunDhta hua

dil mein siwae hasrat-e-pamal kuchh nahin

is ghar mein ek charagh hai wo bhi bujha hua

saqi ye tera ‘shahid’-e-maKHmur to nahin

aata hai mai-kade mein koi jhumta hua