kyon toD diye jate hain samar kamzor shajar ki Daliyon se

kyoñ toḌ diye jaate haiñ samar kamzor shajar kī Dāliyoñ se

maike se bhī dil kaT jaatā hai miltā bhī nahīñ sasurāliyoñ se

āñkhoñ meñ utar aatī thī namī ham muḳhlis the par log nahīñ

jazbāt sañbhal nahīñ paate the muñh bhar jaatā thā gāliyoñ se

ik kachchī 'umr kī laḌkī ke kuchh ḳhvāb the kuchh āshā.eñ thiiñ

aur 'ishq thā us ke bachpan kā is baaġh meñ rahne vāliyoñ se

āñkhoñ meñ lajjā kā surma thā gāloñ pe hayā kī laalī thī

māthe pe safedī chāñdī kī kānoñ kī suñdartā bāliyoñ se

'izzat kā kachūmar bantā hai miTTī meñ milātī hai ġhurbat

paise ke pujārī jhukte haiñ karte haiñ suvāgat tāliyoñ se

'ushshāq-e-azal kī qismat meñ likkhī hai sarāsar bezārī

kyā uns kisī but-ḳhāne se kyā nisbat un kī gāliyoñ se

dil lagtī baat kaheñ to ye achchhā jo lage vo achchhā hai

hote haiñ mubarrā 'ishq ke sālik goriyoñ se aur kāliyoñ se

Thukrā.e huoñ ke aaqā haiñ taḌpā.e huoñ ke marham haiñ

kabhī aa ke tasallī ḳhvāb meñ deñ kabhī jhāñkeñ sunahrī jāliyoñ se

kyon toD diye jate hain samar kamzor shajar ki Daliyon se

maike se bhi dil kaT jata hai milta bhi nahin sasuraliyon se

aankhon mein utar aati thi nami hum muKHlis the par log nahin

jazbaat sanbhal nahin pate the munh bhar jata tha galiyon se

ek kachchi 'umr ki laDki ke kuchh KHwab the kuchh aashaen thin

aur 'ishq tha us ke bachpan ka is bagh mein rahne waliyon se

aankhon mein lajja ka surma tha galon pe haya ki lali thi

mathe pe safedi chandi ki kanon ki sundarta baaliyon se

'izzat ka kachumar banta hai miTTi mein milati hai ghurbat

paise ke pujari jhukte hain karte hain suwagat taliyon se

'ushshaq-e-azal ki qismat mein likkhi hai sarasar bezari

kya uns kisi but-KHane se kya nisbat un ki galiyon se

dil lagti baat kahen to ye achchha jo lage wo achchha hai

hote hain mubarra 'ishq ke salik goriyon se aur kaliyon se

Thukrae huon ke aaqa hain taDpae huon ke marham hain

kabhi aa ke tasalli KHwab mein den kabhi jhanken sunahri jaliyon se