کیوں تجھ سے کوئی راہ سجھائی نہیں جاتی

کیوں تجھ سے کوئی راہ سجھائی نہیں جاتی

حالت مری ایسی ہے دکھائی نہیں جاتی

افلاک میں موجود ہو جس سمت بھی وہ شخص

خوشبو کسی عالم میں چھپائی نہیں جاتی

یہ عشق ہے اور عشق میں جب آخری حد ہو

پھر جتنی بھی پونجی ہو بچائی نہیں جاتی

وحشت انہیں اسباق پڑھا دیتی ہے سارے

دیوانوں کو تہذیب سکھائی نہیں جاتی

ممکن ہے بھڑک جائے میرا شعلۂ باطن

اب مجھ سے مری آگ دبائی نہیں جاتی

ہم خاک نشیں موج میں ہر پل نہیں ہوتے

ہر روز یہاں بزم سجائی نہیں جاتی

جس طرح سے دن رات کمانے میں لگا ہوں

وحشت کبھی اس طور کمائی نہیں جاتی

کیا علم یہ کڑواہٹیں آئی ہیں کہاں سے

جامیؔ یہ مری تلخ نوائی نہیں جاتی