kyon ye husn-e-nazar diya tu ne

kyoñ ye husn-e-nazar diyā tū ne

vaqf-e-ālām kar diyā tū ne

mundamil jo kabhī na ho paa.e

aisā zaḳhm-e-jigar diyā tū ne

kaun mansūr jo chaḌhe suulī

yuuñ to sab ko jigar diyā tū ne

Dūbtī nabz karb sannāTe

aur hukm-e-safar diyā tū ne

zindagī chhāñv ko tarastī hai

kaisā jaltā safar diyā tū ne

taaj bante hī haath kaTte haiñ

kaisā dast-e-hunar diyā tū ne

is jahāñ kā har ek ġham lā kar

mere dāman meñ bhar diyā tū ne

sab ke hāthoñ meñ de diye patthar

mujh ko shīshe kā ghar diyā tū ne

jis ne mujh ko vaqār baḳhshā hai

vo ġham-e-mo'tabar diyā tū ne

kyon ye husn-e-nazar diya tu ne

waqf-e-alam kar diya tu ne

mundamil jo kabhi na ho pae

aisa zaKHm-e-jigar diya tu ne

kaun mansur jo chaDhe suli

yun to sab ko jigar diya tu ne

Dubti nabz karb sannaTe

aur hukm-e-safar diya tu ne

zindagi chhanw ko tarasti hai

kaisa jalta safar diya tu ne

taj bante hi hath kaTte hain

kaisa dast-e-hunar diya tu ne

is jahan ka har ek gham la kar

mere daman mein bhar diya tu ne

sab ke hathon mein de diye patthar

mujh ko shishe ka ghar diya tu ne

jis ne mujh ko waqar baKHsha hai

wo gham-e-mo'tabar diya tu ne