kyun bahaar aate hi pahlu mein bujha aap hi aap

kyuuñ bahār aate hī pahlū meñ bujhā aap hī aap

yā-ilāhī mire dil ko huā kyā aap hī aap

ḳhat meñ likkhā huā aa.egā judā.ī kā payām

ḳhvāb meñ ḳhat ke hue harf judā aap hī aap

nabzeñ Duubī huī bīmār kī paa.eñ shāyad

haath mil kar koī bālīñ se uThā aap hī aap

na talab thī mire dil kī na ishāra un kā

jaam lene ko mirā haath baḌhā aap hī aap

'ishq-e-sādiq kā kahīñ zikr huā thā shāyad

us ne mahfil meñ mirā naam liyā aap hī aap

sham'-e-mahfil tumheñ kahtā thā zamāna dekhā

huā parvāna-e-dil uḌ ke fidā aap hī aap

jazb-e-dil kā ye asar bazm-e-adū meñ bhī huā

kasmasāte hue kuchh us ne kahā aap hī aap

shoḳhī-e-husn jigar-soz kā iimā ye na thā

bigḌī hai sham' kī mahfil meñ havā aap hī aap

tum ne dushman se kahīñ aañkh laḌā.ī hogī

kyuuñ huā tīr-e-nazar aaj ḳhatā aap hī aap

'shād' ne aaj ye maqtal meñ tamāshā dekhā

dast-e-qātil se lagī uḌne hinā aap hī aap

kyun bahaar aate hi pahlu mein bujha aap hi aap

ya-ilahi mere dil ko hua kya aap hi aap

KHat mein likkha hua aaega judai ka payam

KHwab mein KHat ke hue harf juda aap hi aap

nabzen Dubi hui bimar ki paen shayad

hath mil kar koi baalin se uTha aap hi aap

na talab thi mere dil ki na ishaara un ka

jam lene ko mera hath baDha aap hi aap

'ishq-e-sadiq ka kahin zikr hua tha shayad

us ne mahfil mein mera nam liya aap hi aap

sham'-e-mahfil tumhein kahta tha zamana dekha

hua parwana-e-dil uD ke fida aap hi aap

jazb-e-dil ka ye asar bazm-e-adu mein bhi hua

kasmasate hue kuchh us ne kaha aap hi aap

shoKHi-e-husn jigar-soz ka ima ye na tha

bigDi hai sham' ki mahfil mein hawa aap hi aap

tum ne dushman se kahin aankh laDai hogi

kyun hua tir-e-nazar aaj KHata aap hi aap

'shad' ne aaj ye maqtal mein tamasha dekha

dast-e-qatil se lagi uDne hina aap hi aap