kyun band sab khule hain kyun chir aTpaTa hai

kyuuñ band sab khule haiñ kyuuñ chiir aTpaTā hai

kyā qatl kuuñ hamāre ab ThāTh yuuñ ThaThā hai

is vaqt meñ pyāre ham kuuñ sharāb diije

dekho to kyā huā hai rījho to kyā ghaTā hai

birhan ke nain ro ro jogī baran hue haiñ

kājar bhabhūt anjhū maalā palak jaTā hai

ḳhvāh lāThiyoñ siiñ maaro ḳhvāh ḳhaak meñ lathāḌo

āshiq kā dil piyāre chaugān kā baTā hai

lab kuuñ añkhiyoñ kuuñ mukh kuuñ bar kuuñ kamar kuuñ qad kuuñ

in sab ko chāhtā hai TukḌe ho dil baTā hai

sāmān-e-aish ham kuuñ asbāb-e-ġham hue haiñ

ḳhūn-e-jigar hai sahbā baḳht-e-siyah ghaTā hai

kyā rañg hai tumhāre ruḳhsār kā sirījan

jis par nazar kare siiñ gul kā jigar phaTā hai

āshiq kī 'ābrū' hai ḳhvārī meñ jaan denā

nāmard vo kahāve jo ishq siiñ haTā hai

kyun band sab khule hain kyun chir aTpaTa hai

kya qatl kun hamare ab ThaTh yun ThaTha hai

is waqt mein pyare hum kun sharab dije

dekho to kya hua hai rijho to kya ghaTa hai

birhan ke nain ro ro jogi baran hue hain

kajar bhabhut anjhu mala palak jaTa hai

KHwah laThiyon sin maro KHwah KHak mein lathaDo

aashiq ka dil piyare chaugan ka baTa hai

lab kun ankhiyon kun mukh kun bar kun kamar kun qad kun

in sab ko chahta hai TukDe ho dil baTa hai

saman-e-aish hum kun asbab-e-gham hue hain

KHun-e-jigar hai sahba baKHt-e-siyah ghaTa hai

kya rang hai tumhaare ruKHsar ka sirijan

jis par nazar kare sin gul ka jigar phaTa hai

aashiq ki 'abru' hai KHwari mein jaan dena

namard wo kahawe jo ishq sin haTa hai