kyun kah ke dil ka haal use bad-guman karun

kyuuñ kah ke dil kā haal use bad-gumāñ karūñ

ye raaz vo nahīñ hai jise maiñ bayāñ karūñ

mujh ko ye zid ki vasl kā iqrār tum se luuñ

tum ko ye haT ki maiñ na kabhī tujh se haañ karūñ

ye kah rahī hai mujh se kisī kī nigāh-e-sharm

fursat agar hayā se mile shoḳhiyāñ karūñ

tū mujh ko aazmā ke vafā-dāriyoñ meñ dekh

maiñ bevafā.iyoñ meñ tirā imtihāñ karūñ

uktā gayā hai shar.a kī pābandiyoñ se jī

dil chāhtā hai bai.at-e-pīr-e-muġhāñ karūñ

'beḳhud' rafīq hai na koī ham-tarīq hai

dil par jo kuchh guzartī hai kis se bayāñ karūñ

kyun kah ke dil ka haal use bad-guman karun

ye raaz wo nahin hai jise main bayan karun

mujh ko ye zid ki wasl ka iqrar tum se lun

tum ko ye haT ki main na kabhi tujh se han karun

ye kah rahi hai mujh se kisi ki nigah-e-sharm

fursat agar haya se mile shoKHiyan karun

tu mujh ko aazma ke wafa-dariyon mein dekh

main bewafaiyon mein tera imtihan karun

ukta gaya hai shara ki pabandiyon se ji

dil chahta hai baiat-e-pir-e-mughan karun

'beKHud' rafiq hai na koi ham-tariq hai

dil par jo kuchh guzarti hai kis se bayan karun