kyun kahte ho kya meri jafa ko nahin dekha

kyuuñ kahte ho kyā merī jafā ko nahīñ dekhā

aate hue kah kah ke qazā ko nahīñ dekhā

ā.īna-e-kaunain haiñ donoñ mirī āñkheñ

tum ko nahīñ dekhā ki ḳhudā ko nahīñ dekhā

dekhe to koī tez-ravī umr-e-ravāñ kī

phir kar kabhī naqsh-e-kaf-e-pā ko nahīñ dekhā

har ḳhaar se yuuñ pūchhtī hai dasht meñ lailā

tum ne to kisī ābla-pā ko nahīñ dekhā

kis ġhash pe tumheñ naaz hai ai hazrat-e-mūsā

un kī nigah-e-hosh-rubā ko nahīñ dekhā

ā.īna-e-vahdat hai dil-e-sāf hamārā

kis but meñ nazar shān-e-ḳhudā ko nahīñ dekhā

kyun kahte ho kya meri jafa ko nahin dekha

aate hue kah kah ke qaza ko nahin dekha

aaina-e-kaunain hain donon meri aankhen

tum ko nahin dekha ki KHuda ko nahin dekha

dekhe to koi tez-rawi umr-e-rawan ki

phir kar kabhi naqsh-e-kaf-e-pa ko nahin dekha

har KHar se yun puchhti hai dasht mein laila

tum ne to kisi aabla-pa ko nahin dekha

kis ghash pe tumhein naz hai ai hazrat-e-musa

un ki nigah-e-hosh-ruba ko nahin dekha

aaina-e-wahdat hai dil-e-saf hamara

kis but mein nazar shan-e-KHuda ko nahin dekha