kyun kahun koi qad-awar nahin aaya ab tak

kyuuñ kahūñ koī qad-āvar nahīñ aayā ab tak

haañ mire qad ke barābar nahīñ aayā ab tak

ek muddat se huuñ maiñ sīna-sipar maidāñ meñ

hamla-āvar koī baḌh kar nahīñ aayā ab tak

ye to dariyā haiñ jo aape se guzar jaate haiñ

josh meñ varna samundar nahīñ aayā ab tak

hoñge manzil se ham-āġhosh ye ummīd bañdhī

rāste meñ koī patthar nahīñ aayā ab tak

kyā zamāne meñ koī gosh-bar-āvāz nahīñ

koī bhī dil kī sadā par nahīñ aayā ab tak

jaane kyā baat hai saaqī ki tirī mahfil meñ

jo gayā baḌh vo palaT kar nahīñ aayā ab tak

intihā ye hai ki pathrā ga.iiñ āñkheñ apnī

sāmne vo parī-paikar nahīñ aayā ab tak

kyā karishma hai dur-e-ashk-e-mohabbat apnā

sadaf-e-chashm se bāhar nahīñ aayā ab tak

muntazir huuñ maiñ kafan bāñdh ke sar se 'ājiz'

sāmne se koī ḳhanjar nahīñ aayā ab tak

kyun kahun koi qad-awar nahin aaya ab tak

han mere qad ke barabar nahin aaya ab tak

ek muddat se hun main sina-sipar maidan mein

hamla-awar koi baDh kar nahin aaya ab tak

ye to dariya hain jo aape se guzar jate hain

josh mein warna samundar nahin aaya ab tak

honge manzil se ham-aghosh ye ummid bandhi

raste mein koi patthar nahin aaya ab tak

kya zamane mein koi gosh-bar-awaz nahin

koi bhi dil ki sada par nahin aaya ab tak

jaane kya baat hai saqi ki teri mahfil mein

jo gaya baDh wo palaT kar nahin aaya ab tak

intiha ye hai ki pathra gain aankhen apni

samne wo pari-paikar nahin aaya ab tak

kya karishma hai dur-e-ashk-e-mohabbat apna

sadaf-e-chashm se bahar nahin aaya ab tak

muntazir hun main kafan bandh ke sar se 'ajiz'

samne se koi KHanjar nahin aaya ab tak