kyun KHayal-e-ranj-o-rahat se na hon begana hum

kyuuñ ḳhayāl-e-ranj-o-rāhat se na hoñ begāna ham

jalva-gāh-e-yār hai dil yā'nī ḳhalvat-ḳhāna ham

haiñ kabhī vā'iz kabhī haiñ murshid-e-mai-ḳhāna ham

ghūmte jaate haiñ hasb-e-gardish-e-paimāna ham

laakh par bhārī haiñ terī dast-gīrī chāhiye

kyuuñ kisī pe baar hoñ ai himmat-e-mardāna ham

khā.iye ye zahr kab tak khaa.e jaatī hai ye ziist

ai ajal kab tak raheñge rahn-e-āb-o-dāna ham

tū hameñ kahtā hai dīvāna to dīvāne sahī

pand-go āḳhir tujhe ab kyā kaheñ dīvāna ham

mudda.ī dil 'ishq ā.īn-o-adālat bazm-e-nāz

dīd-bāzī jurm mujrim aañkh hai jurmāna ham

āb-e-ashk-o-ātish-e-shauq-o-havā-e-āh se

haiñ vajūd-ārā.ī-e-ḳhākistar-e-parvāna ham

gum hai nām-e-āmirī ḳhuub ai nigāh-e-sāmrī

tere afsūñ se bane haiñ zīnat-e-afsāna ham

vaj.h-e-rusvā.ī hai 'nātiq' mastī-e-bazm-e-suḳhan

bāda-paimā haiñ ba-jām-e-ġhālib-e-mastāna ham

kyun KHayal-e-ranj-o-rahat se na hon begana hum

jalwa-gah-e-yar hai dil ya'ni KHalwat-KHana hum

hain kabhi wa'iz kabhi hain murshid-e-mai-KHana hum

ghumte jate hain hasb-e-gardish-e-paimana hum

lakh par bhaari hain teri dast-giri chahiye

kyun kisi pe bar hon ai himmat-e-mardana hum

khaiye ye zahr kab tak khae jati hai ye zist

ai ajal kab tak rahenge rahn-e-ab-o-dana hum

tu hamein kahta hai diwana to diwane sahi

pand-go aaKHir tujhe ab kya kahen diwana hum

muddai dil 'ishq aain-o-adalat bazm-e-naz

did-bazi jurm mujrim aankh hai jurmana hum

aab-e-ashk-o-atish-e-shauq-o-hawa-e-ah se

hain wajud-arai-e-KHakistar-e-parwana hum

gum hai nam-e-amiri KHub ai nigah-e-samri

tere afsun se bane hain zinat-e-afsana hum

wajh-e-ruswai hai 'natiq' masti-e-bazm-e-suKHan

baada-paima hain ba-jam-e-ghaalib-e-mastana hum