kyun na hum yaad kisi ko sahar-o-sham karen

kyuuñ na ham yaad kisī ko sahar-o-shām kareñ

ho na itnā bhī mohabbat meñ to kyā kaam kareñ

haa.e turbat pe marī naaz se kahnā un kā

aap leTe hue ab hashr tak ārām kareñ

is zamāne meñ tire bādiya-paimā bhī ajab

jam ke baiTheñ jo kahīñ misl-e-nagīñ naam kareñ

ka.aba-o-dair kā miT jaa.e jahāñ se jhagḌā

jalva-e-husn-e-haqīqat vo agar aam kareñ

shaiḳh-jī ye bhī koī baat hai maiḳhāne meñ

aap roza raheñ ham shaġhl-e-mai-o-jām kareñ

muft-ḳhorī kā tarīqa nahīñ achchhā sāhab

ham bhī kuchh kaam kareñ aap bhī kuchh kaam kareñ

aaj hī kyuuñ na gale mil leñ kise kal ma.alūm

ham kahāñ subah kareñ aap kahāñ shaam kareñ

aap kā naqsh-e-qadam pesh-e-nazar hai jin ke

sajda-e-shauq na kyūñkar vo ba-har-gām kareñ

hañs ke farmāte haiñ mujh āshiq-e-gumnām se vo

aap badnām jo ho jaa.eñ baḌā naam kareñ

sach to hai apnī hī ġhaflat ne hai rauñdā ham ko

kis liye ham gila-e-gardish-e-ayyām kareñ

mil ke gulchīñ se ye sayyād ne kī hai sāzish

phūñk kar sahn-e-chaman barq ko badnām kareñ

kyun na hum yaad kisi ko sahar-o-sham karen

ho na itna bhi mohabbat mein to kya kaam karen

hae turbat pe mari naz se kahna un ka

aap leTe hue ab hashr tak aaram karen

is zamane mein tere baadiya-paima bhi ajab

jam ke baiThen jo kahin misl-e-nagin nam karen

kaba-o-dair ka miT jae jahan se jhagDa

jalwa-e-husn-e-haqiqat wo agar aam karen

shaiKH-ji ye bhi koi baat hai maiKHane mein

aap roza rahen hum shaghl-e-mai-o-jam karen

muft-KHori ka tariqa nahin achchha sahab

hum bhi kuchh kaam karen aap bhi kuchh kaam karen

aaj hi kyun na gale mil len kise kal malum

hum kahan subah karen aap kahan sham karen

aap ka naqsh-e-qadam pesh-e-nazar hai jin ke

sajda-e-shauq na kyunkar wo ba-har-gam karen

hans ke farmate hain mujh aashiq-e-gumnam se wo

aap badnam jo ho jaen baDa nam karen

sach to hai apni hi ghaflat ne hai raunda hum ko

kis liye hum gila-e-gardish-e-ayyam karen

mil ke gulchin se ye sayyaad ne ki hai sazish

phunk kar sahn-e-chaman barq ko badnam karen