kyun na ho shauq tere dar pe jabin-sai ka

kyuuñ na ho shauq tire dar pe jabīñ-sā.ī kā

us meñ jauhar hai mirī ā.īna-sīmā.ī kā

tuur kushta hai usī nāz-e-ḳhud-ārā.ī kā

barq kī lahr hai naqsha tirī añgḌā.ī kā

ishq ik tabsira hai husn kī ra.anā.ī par

husn ik falsafa hai ishq kī rusvā.ī kā

aaj ik ḳhaak kā zarra bhī nahīñ baaqī hai

dil-e-barbād ye hāsil hai ḳhud-ārā.ī kā

yād-e-ayyām ki thī lab pe mire mohar-e-sukūt

ab to mātam hai bapā dil meñ shakebā.ī kā

mauj-dar-mauj ravāñ bāda-e-sar-josh-e-shabāb

ālam-e-kaif hai aalam tirī añgḌā.ī kā

hasrat-o-yās kā amboh magar maiñ bekas

aise majme.a meñ ye aalam mirī tanhā.ī kā

tīrgī shām-e-lahad kī hai bhayānak lekin

hai ye utrā huā jaama shab-e-tanhā.ī kā

jazr-o-mad husn ke dariyā meñ nazar aatā hai

qābil-e-dīd hai aalam tirī añgḌā.ī kā

tere dīdār se mahrūm rahīñ jab āñkheñ

koī masraf hī nahīñ phir mirī bīnā.ī kā

ālam-e-gor-e-ġharībāñ kā ye ġhamnāk sukūt

ik namūna hai mire dil kī shakebā.ī kā

niiñd un kī agar uḌ jaa.e to kuchh duur nahīñ

so gayā jāgne vaalā shab-e-tanhā.ī kā

sher dilkash ho agar saf.ha-e-kāġhaz pe 'azīz'

ik muraqqa.a hai kamāl-e-suḳhan-ārā.ī kā

kyun na ho shauq tere dar pe jabin-sai ka

us mein jauhar hai meri aaina-simai ka

tur kushta hai usi naz-e-KHud-arai ka

barq ki lahr hai naqsha teri angDai ka

ishq ek tabsira hai husn ki ranai par

husn ek falsafa hai ishq ki ruswai ka

aaj ek KHak ka zarra bhi nahin baqi hai

dil-e-barbaad ye hasil hai KHud-arai ka

yaad-e-ayyam ki thi lab pe mere mohar-e-sukut

ab to matam hai bapa dil mein shakebai ka

mauj-dar-mauj rawan baada-e-sar-josh-e-shabab

aalam-e-kaif hai aalam teri angDai ka

hasrat-o-yas ka amboh magar main bekas

aise majmea mein ye aalam meri tanhai ka

tirgi sham-e-lahad ki hai bhayanak lekin

hai ye utra hua jama shab-e-tanhai ka

jazr-o-mad husn ke dariya mein nazar aata hai

qabil-e-did hai aalam teri angDai ka

tere didar se mahrum rahin jab aankhen

koi masraf hi nahin phir meri binai ka

aalam-e-gor-e-ghariban ka ye ghamnak sukut

ek namuna hai mere dil ki shakebai ka

nind un ki agar uD jae to kuchh dur nahin

so gaya jagne wala shab-e-tanhai ka

sher dilkash ho agar safha-e-kaghaz pe 'aziz'

ek muraqqa hai kamal-e-suKHan-arai ka