kyun na ho zikr mohabbat ka mare nam ke sath

kyuuñ na ho zikr mohabbat kā mare naam ke saath

umr kaaTī hai isī dard-e-dil-ārām ke saath

mujh ko duniyā se nahīñ apnī tabāhī kā gilā

maiñ ne ḳhud saaz kiyā gardish-e-ayyām ke saath

ab vahī ziist meñ hai ye mire dil kā aalam

jaise kuchh chhūTtā jaatā hai har ik gaam ke saath

tujh se shikva nahīñ saaqī tirī sahbā ne magar

dushmanī koī nikālī hai mire jaam ke saath

jo kare fikr-e-rihā.ī vahī dushman Thahre

uns ho jaa.e na taa.ir ko kisī daam ke saath

ziist ke dard kā ehsās kabhī miT na sakā

sin ḳhushī ke bhī kaTe ik ġham-e-be-nām ke saath

man-e-taqsīr kahūñ dāvat-e-taqsīr kahūñ

nigah-e-narm bhī hai garmī-e-ilzām ke saath

apnī is aaj kī tāqat pe na yuuñ itrāo

mehr uTThā thā har ik sub.h-e-shab-anjām ke saath

maiñ tujhe bhuul chukā huuñ magar ab bhī ai dost

aatī jaatī hai nigāhoñ meñ chamak shaam ke saath

ab bhī kaafī hai ye har shor pe chhāne ke liye

koī ulfat kī azaañ de to tire naam ke saath

aa gayā ḳhatm pe sayyād tirā daur-e-fusūñ

ab to daana bhī nahīñ hai qafas-o-dām ke saath

kāḳh-o-aivāñ yahī guzre hue dauroñ ke na hoñ

gard sī aa.ī hai kuchh dāman-e-ayyām ke saath

maiñ tirā ho na sakā phir bhī mohabbat maiñ ne

jab bhī duniyā ko pukārā to tire naam ke saath

ḳhuld ujḌī hai to ab apne farishtoñ se basā

ham se kyā ham to nikāle ga.e ilzām ke saath

hujra-e-ḳhuld hai hūr-e-sharar-andām nahīñ

sāqiyā ātish-e-rañgīñ bhī zarā jaam ke saath

zikr-e-'mullā' bhī ab aatā to hai mahfil meñ magar

phīkī tārīf meñ lipTe hue dushnām ke saath

merī koshish hai ki sheroñ meñ samo duuñ 'mullā'

sub.h kā hosh bhī dīvāngī-e-shām ke saath

do kināroñ ke huuñ mābain meñ ik pal 'mullā'

rakhtā jaatā huuñ sutūñ ek har ik gaam ke saath

kyun na ho zikr mohabbat ka mare nam ke sath

umr kaTi hai isi dard-e-dil-aram ke sath

mujh ko duniya se nahin apni tabahi ka gila

main ne KHud saz kiya gardish-e-ayyam ke sath

ab wahi zist mein hai ye mere dil ka aalam

jaise kuchh chhuTta jata hai har ek gam ke sath

tujh se shikwa nahin saqi teri sahba ne magar

dushmani koi nikali hai mere jam ke sath

jo kare fikr-e-rihai wahi dushman Thahre

uns ho jae na tair ko kisi dam ke sath

zist ke dard ka ehsas kabhi miT na saka

sin KHushi ke bhi kaTe ek gham-e-be-nam ke sath

man-e-taqsir kahun dawat-e-taqsir kahun

nigah-e-narm bhi hai garmi-e-ilzam ke sath

apni is aaj ki taqat pe na yun itrao

mehr uTTha tha har ek subh-e-shab-anjam ke sath

main tujhe bhul chuka hun magar ab bhi ai dost

aati jati hai nigahon mein chamak sham ke sath

ab bhi kafi hai ye har shor pe chhane ke liye

koi ulfat ki azan de to tere nam ke sath

aa gaya KHatm pe sayyaad tera daur-e-fusun

ab to dana bhi nahin hai qafas-o-dam ke sath

kaKH-o-aiwan yahi guzre hue dauron ke na hon

gard si aai hai kuchh daman-e-ayyam ke sath

main tera ho na saka phir bhi mohabbat main ne

jab bhi duniya ko pukara to tere nam ke sath

KHuld ujDi hai to ab apne farishton se basa

hum se kya hum to nikale gae ilzam ke sath

hujra-e-KHuld hai hur-e-sharar-andam nahin

saqiya aatish-e-rangin bhi zara jam ke sath

zikr-e-'mulla' bhi ab aata to hai mahfil mein magar

phiki tarif mein lipTe hue dushnam ke sath

meri koshish hai ki sheron mein samo dun 'mulla'

subh ka hosh bhi diwangi-e-sham ke sath

do kinaron ke hun mabain mein ek pal 'mulla'

rakhta jata hun sutun ek har ek gam ke sath