kyun na mujhko tera pata mil jae

kyuuñ na mujh ko tirā patā mil jaa.e

DhūñDne vāloñ ko ḳhudā mil jaa.e

vaqt kī rahguzār meñ shāyad

koī mujh sā shikasta-pā mil jaa.e

ham ko tanhā.iyāñ nasīb raheñ

aur tumheñ ham sā dūsrā mil jaa.e

aks huuñ aur bhaTak rahī huuñ maiñ

chāhtī huuñ ki ā.īna mil jaa.e

yā to is dasht meñ shajar ho koī

yā mujhe ghar kā rāsta mil jaa.e

ek jaisī udāsiyāñ kab tak

dard dil ko koī nayā mil jaa.e

tū mujhe is tarah milā jaise

raat ko chāñd kā diyā mil jaa.e

kyun na mujh ko tera pata mil jae

DhunDne walon ko KHuda mil jae

waqt ki rahguzar mein shayad

koi mujh sa shikasta-pa mil jae

hum ko tanhaiyan nasib rahen

aur tumhein hum sa dusra mil jae

aks hun aur bhaTak rahi hun main

chahti hun ki aaina mil jae

ya to is dasht mein shajar ho koi

ya mujhe ghar ka rasta mil jae

ek jaisi udasiyan kab tak

dard dil ko koi naya mil jae

tu mujhe is tarah mila jaise

raat ko chand ka diya mil jae