kyun na nairang-e-junun par koi qurban ho jae

kyuuñ na nairañg-e-junūñ par koī qurbāñ ho jaa.e

ghar vo sahrā ki bahār aa.e to zindāñ ho jaa.e

barq dam lene ko Thahre to rag-e-jāñ ho jaa.e

fitna-e-hashr mujassam ho to insāñ ho jaa.e

jauhar-e-ā.īna-e-dil hai vo tasvīr hai tū

dil vo ā.īna ki tū dekh ke hairāñ ho jaa.e

ġham vo rāhat jise qismat ke dhanī paate haiñ

dam vo mushkil hai ki maut aa.e to āsāñ ho jaa.e

ishq vo kufr ki īmān hai dil vāloñ kā

aql majbūr vo kāfir jo musalmāñ ho jaa.e

zarra vo rāz-e-bayābāñ hai jo ifshā na huā

dasht-e-vahshat hai vo zarra jo bayābāñ ho jaa.e

ġham-e-mehsūs vo bātil jise kahte haiñ majāz

dil kī hastī vo haqīqat hai jo uryāñ ho jaa.e

ḳhuld mai-ḳhāne ko kahte haiñ ba-qaul-e-vā.iz

kā'ba but-ḳhāne ko kahte haiñ jo vīrāñ ho jaa.e

sajda kahte haiñ dar-e-yār pe mar jaane ko

qibla vo sar hai jo ḳhāk-e-rah-e-jānāñ ho jaa.e

maut vo din bhī dikhā.e mujhe jis din 'fānī'

zindagī apnī jafāoñ pe pashemāñ ho jaa.e

kyun na nairang-e-junun par koi qurban ho jae

ghar wo sahra ki bahaar aae to zindan ho jae

barq dam lene ko Thahre to rag-e-jaan ho jae

fitna-e-hashr mujassam ho to insan ho jae

jauhar-e-aina-e-dil hai wo taswir hai tu

dil wo aaina ki tu dekh ke hairan ho jae

gham wo rahat jise qismat ke dhani pate hain

dam wo mushkil hai ki maut aae to aasan ho jae

ishq wo kufr ki iman hai dil walon ka

aql majbur wo kafir jo musalman ho jae

zarra wo raaz-e-bayaban hai jo ifsha na hua

dasht-e-wahshat hai wo zarra jo bayaban ho jae

gham-e-mehsus wo baatil jise kahte hain majaz

dil ki hasti wo haqiqat hai jo uryan ho jae

KHuld mai-KHane ko kahte hain ba-qaul-e-waiz

ka'ba but-KHane ko kahte hain jo viran ho jae

sajda kahte hain dar-e-yar pe mar jaane ko

qibla wo sar hai jo KHak-e-rah-e-jaanan ho jae

maut wo din bhi dikhae mujhe jis din 'fani'

zindagi apni jafaon pe pasheman ho jae