kyun naseha udhar ko na munh kar ke soiye

kyuuñ nāsehā udhar ko na muñh kar ke soiye

dil to kahe hai saath hī dilbar ke soiye

ghabrā ke us kā kahnā vo haa.e shab-e-visāl

bas bas zarā ab aap to haT kar ke soiye

maiñ aap se ḳhafā huuñ ki tum rūThe ho paḌe

bohtān mere sar pe na yuuñ dhar ke soiye

sote meñ bhī jo dekhiye to chauñk hī uThe

kis tarah saath aise sitamgar ke soiye

tum lutf-e-nashsha dekho zarā tum ko dekheñ ham

kyā lutf hai ki lete hī sāġhar ke soiye

mash.hūr hai ki suulī pe bhī niiñd aatī hai

yā-rab shab-e-firāq meñ kyūñkar ke soiye

takiya to aap sar ke tale roz rakhte haiñ

ab haath mere rakh ke tale sar ke soiye

vo muskurā rahe ho lo vo aañkh khul ga.ī

yuuñ kaun māntā hai ki jag kar ke soiye

pās-e-adū to dekho hameñ hukm hai 'nizām'

shab ko kaheñ na paas mire ghar ke soiye

kyun naseha udhar ko na munh kar ke soiye

dil to kahe hai sath hi dilbar ke soiye

ghabra ke us ka kahna wo hae shab-e-visal

bas bas zara ab aap to haT kar ke soiye

main aap se KHafa hun ki tum ruThe ho paDe

bohtan mere sar pe na yun dhar ke soiye

sote mein bhi jo dekhiye to chaunk hi uThe

kis tarah sath aise sitamgar ke soiye

tum lutf-e-nashsha dekho zara tum ko dekhen hum

kya lutf hai ki lete hi saghar ke soiye

mashhur hai ki suli pe bhi nind aati hai

ya-rab shab-e-firaq mein kyunkar ke soiye

takiya to aap sar ke tale roz rakhte hain

ab hath mere rakh ke tale sar ke soiye

wo muskura rahe ho lo wo aankh khul gai

yun kaun manta hai ki jag kar ke soiye

pas-e-adu to dekho hamein hukm hai 'nizam'

shab ko kahen na pas mere ghar ke soiye