kyun rang-e-surKH tera ab zard ho gaya hai

kyuuñ rañg-e-surḳh terā ab zard ho gayā hai

tū hī magar hamārā hamdard ho gayā hai

ve din ga.e ki dil meñ rahtā thā dard apne

ab dil nahīñ sarāpā ik dard ho gayā hai

itnā to farq mujh meñ aur dil meñ hai ki tujh bin

maiñ ḳhaak ho gayā huuñ vo gard ho gayā hai

hai chaak chaak siina kyūñkar chhupe tū dil meñ

ye to makān saarā be-pard ho gayā hai

kis tarah shaiḳh chheḌe ab duḳht-e-raz ko aa kar

is tarf se bechārā nāmard ho gayā hai

yaañ kyā na thā jo vaañ kī rakkhe 'hasan' tavaqqo

donoñ jahāñ se apnā dil sard ho gayā hai

kyun rang-e-surKH tera ab zard ho gaya hai

tu hi magar hamara hamdard ho gaya hai

we din gae ki dil mein rahta tha dard apne

ab dil nahin sarapa ek dard ho gaya hai

itna to farq mujh mein aur dil mein hai ki tujh bin

main KHak ho gaya hun wo gard ho gaya hai

hai chaak chaak sina kyunkar chhupe tu dil mein

ye to makan sara be-pard ho gaya hai

kis tarah shaiKH chheDe ab duKHt-e-raz ko aa kar

is tarf se bechaara namard ho gaya hai

yan kya na tha jo wan ki rakkhe 'hasan' tawaqqo

donon jahan se apna dil sard ho gaya hai