kyun sadgi se uski takrar ho gai hai

kyuuñ sādgī se us kī takrār ho ga.ī hai

tahzīb se tabī.at bezār ho ga.ī hai

niklī zabān se thī chhoTī sī baat lekin

mābain do diloñ ke dīvār ho ga.ī hai

kaliyāñ khilā rahī thī shoḳhī nasīm-āsā

jab tanz ban ga.ī hai talvār ho ga.ī hai

duniyā ke mashġhaloñ meñ ye ghir gayā hai aisā

ab dil se baat karnī dushvār ho ga.ī hai

pherī nigāh mujh se jaise na jānte hoñ

āñkhoñ kī sa.ī-e-aḳhfā iz.hār ho ga.ī hai

uupar tale lage haiñ ambār har tarah ke

nagrī ye hāfiza kī bāzār ho ga.ī hai

aa.ī hai arz saarī ab us ke dā.ere meñ

taḳh.īl pā-ba-jaulāñ pur-kār ho ga.ī hai

haamī bharī thī dil ne taġh.īr-e-rañg dekho

jab tak laboñ pe aa.ī inkār ho ga.ī hai

kyun sadgi se us ki takrar ho gai hai

tahzib se tabiat bezar ho gai hai

nikli zaban se thi chhoTi si baat lekin

mabain do dilon ke diwar ho gai hai

kaliyan khila rahi thi shoKHi nasim-asa

jab tanz ban gai hai talwar ho gai hai

duniya ke mashghalon mein ye ghir gaya hai aisa

ab dil se baat karni dushwar ho gai hai

pheri nigah mujh se jaise na jaante hon

aankhon ki sai-e-aKHfa izhaar ho gai hai

upar tale lage hain ambar har tarah ke

nagri ye hafiza ki bazar ho gai hai

aai hai arz sari ab us ke daere mein

taKHil pa-ba-jaulan pur-kar ho gai hai

hami bhari thi dil ne taghir-e-rang dekho

jab tak labon pe aai inkar ho gai hai