kyun tu ne wa kiya tha band-e-qaba chaman mein

kyuuñ tū ne vā kiyā thā band-e-qabā chaman meñ

uḌtī phire hai gul se bulbul ḳhafā chaman meñ

har samt ab sabā jo phirtī hai ḳhaak uḌātī

bulbul ke par paḌe haiñ kyā jā-ba-jā chaman meñ

nargis kī aañkh tujh par paḌtī hai be-tarah sī

mat vaqt-e-shām jaanā bahr-e-ḳhudā chaman meñ

juuñ laala dāġh-e-dil yaañ phir jal uThā hai shāyad

jaatā hai sair karne vo bevafā chaman meñ

jeb apnā gul ne phāḌā bulbul muī 'muravvat'

kyuuñ apne ġham kā qissa tū ne kahā chaman meñ

kyun tu ne wa kiya tha band-e-qaba chaman mein

uDti phire hai gul se bulbul KHafa chaman mein

har samt ab saba jo phirti hai KHak uDati

bulbul ke par paDe hain kya ja-ba-ja chaman mein

nargis ki aankh tujh par paDti hai be-tarah si

mat waqt-e-sham jaana bahr-e-KHuda chaman mein

jun lala dagh-e-dil yan phir jal uTha hai shayad

jata hai sair karne wo bewafa chaman mein

jeb apna gul ne phaDa bulbul mui 'murawwat'

kyun apne gham ka qissa tu ne kaha chaman mein