kyun zist ka har ek fasana badal gaya

kyuuñ ziist kā har ek fasāna badal gayā

ye ham badal ga.e ki zamāna badal gayā

sayyād yaañ vahī vahī taa.ir vahī haiñ daam

lekin jo zer-e-dām thā daana badal gayā

bāzī-e-husn-o-ishq meñ kuchh haar hai na jiit

nazreñ milīñ diloñ kā ḳhazāna badal gayā

baḳht-e-bashar vahī hai bisāt-e-jahāñ vahī

har daur-e-nau meñ maat kā ḳhāna badal gayā

tāqat ke dosh par hai azal se bashar kī laash

bas thoḌī thoḌī duur pe shāna badal gayā

mahfil ke hasb-e-zauq hai mutrib kā saaz bhī

mahfil badal ga.ī to tarāna badal gayā

in dāġh-hā-e-dil meñ koī zaḳhm-e-nau nahīñ

shāyad kisī nazar kā nishāna badal gayā

'mullā' ko zor-e-tab.a huā faisloñ kī nazr

dariyā abhī vahī hai dahāna badal gayā

kyun zist ka har ek fasana badal gaya

ye hum badal gae ki zamana badal gaya

sayyaad yan wahi wahi tair wahi hain dam

lekin jo zer-e-dam tha dana badal gaya

bazi-e-husn-o-ishq mein kuchh haar hai na jit

nazren milin dilon ka KHazana badal gaya

baKHt-e-bashar wahi hai bisat-e-jahan wahi

har daur-e-nau mein mat ka KHana badal gaya

taqat ke dosh par hai azal se bashar ki lash

bas thoDi thoDi dur pe shana badal gaya

mahfil ke hasb-e-zauq hai mutrib ka saz bhi

mahfil badal gai to tarana badal gaya

in dagh-ha-e-dil mein koi zaKHm-e-nau nahin

shayad kisi nazar ka nishana badal gaya

'mulla' ko zor-e-taba hua faislon ki nazr

dariya abhi wahi hai dahana badal gaya