kyunkar nashat-e-shauq ki muddat guzar gai

kyūñkar nashāt-e-shauq kī muddat guzar ga.ī

ik mauj-e-bū-e-gul idhar aa.ī udhar ga.ī

ik 'umr jis umiid par apnī guzar ga.ī

āḳhir ko jaan bhī usī ummīd par ga.ī

din raat ho ga.e haiñ baham ik maqām par

zulf-e-siyāh jab tire ruḳh par bikhar ga.ī

vo naaz vo ġhurūr vo andāz kyā kaheñ

kis kis tarah na ham pe qayāmat guzar ga.ī

thak kar jo aaj baiTh ga.e rāh-e-'ishq meñ

ai ahl-e-shauq pahlī sī himmat kidhar ga.ī

'asmā' milī bhī koī ḳhushī kī agar ghaḌī

vo bhī ġhamoñ kī yaad meñ yūñhī guzar ga.ī

kyunkar nashat-e-shauq ki muddat guzar gai

ek mauj-e-bu-e-gul idhar aai udhar gai

ek 'umr jis umid par apni guzar gai

aaKHir ko jaan bhi usi ummid par gai

din raat ho gae hain baham ek maqam par

zulf-e-siyah jab tere ruKH par bikhar gai

wo naz wo ghurur wo andaz kya kahen

kis kis tarah na hum pe qayamat guzar gai

thak kar jo aaj baiTh gae rah-e-'ishq mein

ai ahl-e-shauq pahli si himmat kidhar gai

'asma' mili bhi koi KHushi ki agar ghaDi

wo bhi ghamon ki yaad mein yunhi guzar gai