kyunkar ye tuf-e-ashk se mizhgan mein lagi aag

kyūñkar ye tuf-e-ashk se mizhgāñ meñ lagī aag

shabnam se kahīñ bhī hai niyastāñ meñ lagī aag

na us se dhuāñ nikle hai na sho.ala uThe hai

ye turfa hamāre dil-e-nālāñ meñ lagī aag

ātish jo hamāre tan-e-pur-dāġh kī bhaḌkī

dāman se bujhā.ī to garebāñ meñ lagī aag

ghar tū ne raqīboñ kā na ai aah jalāyā

phir kyā jo mire kulba-e-ihzāñ meñ lagī aag

shāḳheñ shajar-e-bīd se aahū ne ragaḌ kar

vo sho.ala nikālā ki bayābāñ meñ lagī aag

tāsīr tirī dekh lī ai āh-e-sharar-bār

ik din na kabhī gumbad-e-gardāñ meñ lagī aag

allāh-re garmī-e-mai añgūr kī 'ġhāfil'

ik jaam ko piite hī dil-o-jāñ meñ lagī aag

kyunkar ye tuf-e-ashk se mizhgan mein lagi aag

shabnam se kahin bhi hai niyastan mein lagi aag

na us se dhuan nikle hai na shoala uThe hai

ye turfa hamare dil-e-nalan mein lagi aag

aatish jo hamare tan-e-pur-dagh ki bhaDki

daman se bujhai to gareban mein lagi aag

ghar tu ne raqibon ka na ai aah jalaya

phir kya jo mere kulba-e-ihzan mein lagi aag

shaKHen shajar-e-bid se aahu ne ragaD kar

wo shoala nikala ki bayaban mein lagi aag

tasir teri dekh li ai aah-e-sharar-bar

ek din na kabhi gumbad-e-gardan mein lagi aag

allah-re garmi-e-mai angur ki 'ghafil'

ek jam ko pite hi dil-o-jaan mein lagi aag