la-makan nam hai ujDe hue virane ka

lā-makāñ naam hai ujḌe hue vīrāne kā

hū ke aalam meñ hai maskan tire dīvāne kā

shauq-e-rusvā koī dekhe tire dīvāne kā

ḳhud vo āġhāz banā hai kisī afsāne kā

jām-e-dil bāda-e-ulfat se bharā rahtā hai

vaah kyā zarf hai TuuTe hue paimāne kā

dāstāñ ishq kī hai puurī sunā.eñge kalīm

qissa tuur to ik baab hai afsāne kā

sham.a ne bazm meñ jal jal ke jalāyā āḳhir

aah kyā hashr huā ishq meñ parvāne kā

mustatar qulqul-e-mīnā meñ hai rāz-e-mastī

bhed kis tarah khule phir tire mastāne kā

hashr meñ dekh ke majma.a lab-e-kausar saaqī

phir gayā āñkhoñ meñ naqsha tire maiḳhāne kā

milte hī sāġhar-o-shīsha se chhalak jaatā hai

ye bhī kyā daur hai saaqī tire paimāne kā

kyā qayāmat hai ki mahshar meñ bhī pursish na huī

hashr ab dekhiye kyā ho tire dīvāne kā

saf.ha dil mirā ā.īna-e-ramz-e-tauhīd

rāz-e-kaunain ḳhulāsa mire afsāne kā

'shauq' ab kis liye fikr-e-mai-o-mai-ḳhāna hai

bharne vaalā to koī aur hai paimāne kā

la-makan nam hai ujDe hue virane ka

hu ke aalam mein hai maskan tere diwane ka

shauq-e-ruswa koi dekhe tere diwane ka

KHud wo aaghaz bana hai kisi afsane ka

jam-e-dil baada-e-ulfat se bhara rahta hai

wah kya zarf hai TuTe hue paimane ka

dastan ishq ki hai puri sunaenge kalim

qissa tur to ek bab hai afsane ka

shama ne bazm mein jal jal ke jalaya aaKHir

aah kya hashr hua ishq mein parwane ka

mustatar qulqul-e-mina mein hai raaz-e-masti

bhed kis tarah khule phir tere mastane ka

hashr mein dekh ke majma lab-e-kausar saqi

phir gaya aankhon mein naqsha tere maiKHane ka

milte hi saghar-o-shisha se chhalak jata hai

ye bhi kya daur hai saqi tere paimane ka

kya qayamat hai ki mahshar mein bhi pursish na hui

hashr ab dekhiye kya ho tere diwane ka

safha dil mera aaina-e-ramz-e-tauhid

raaz-e-kaunain KHulasa mere afsane ka

'shauq' ab kis liye fikr-e-mai-o-mai-KHana hai

bharne wala to koi aur hai paimane ka