la-makan se bhi pare KHud se mulaqat karen

lā-makāñ se bhī pare ḳhud se mulāqāt kareñ

khul ke tanhā.ī kī vus.at pe zarā baat kareñ

har baḌe naam ko chhoToñ se jilā miltī hai

shahr kī hāshiya-ārā.ī mazāfāt kareñ

laaj vīrānī kī rakhnī hai chalo ahl-e-junūñ

ābla-pā.ī se ābād ḳharābāt kareñ

khet sūkhe to havā phir se sanak jā.egī

aap bādal haiñ to da.avā nahīñ barsāt kareñ

gulnavāzo hameñ kāñToñ ne navāzā hai bahut

ham pe vājib hai ki zaḳhmoñ kī mudārāt kareñ

aish-e-āvārgī kyā kyā the tirī galiyoñ meñ

soch kī pariyāñ vahīñ ab guzar auqāt kareñ

maiñ agar zikr bhī us kā na karūñ sheroñ meñ

isti.ārāt alāmāt ishārāt kareñ

matn ko husn ke eraab atā ham ne kiye

ham se tashrīh talab jism kī āyāt kareñ

ġhair mahram se bachā apnī ġhazal ko 'āzim'

chheḌḳhānī na kahīñ maulvī hazrāt kareñ

la-makan se bhi pare KHud se mulaqat karen

khul ke tanhai ki wusat pe zara baat karen

har baDe nam ko chhoTon se jila milti hai

shahr ki hashiya-arai mazafat karen

laj virani ki rakhni hai chalo ahl-e-junun

aabla-pai se aabaad KHarabaat karen

khet sukhe to hawa phir se sanak jaegi

aap baadal hain to dawa nahin barsat karen

gulnawazo hamein kanTon ne nawaza hai bahut

hum pe wajib hai ki zaKHmon ki mudaraat karen

aish-e-awargi kya kya the teri galiyon mein

soch ki pariyan wahin ab guzar auqat karen

main agar zikr bhi us ka na karun sheron mein

istiaraat alamat ishaaraat karen

matn ko husn ke erab ata hum ne kiye

hum se tashrih talab jism ki aayat karen

ghair mahram se bacha apni ghazal ko 'azim'

chheDKHani na kahin maulwi hazraat karen