لائے گی رنگ آپ کی یہ دل لگی کچھ اور

لائے گی رنگ آپ کی یہ دل لگی کچھ اور

بڑھ کر رہے گی اب مری آشفتگی کچھ اور

مجھ پر کھلیں گے اور ابھی راز ہائے عشق

دل کو ملے گی لذت بے چارگی کچھ اور

میری حیات عشق ہے تمہید انبساط

جلوے دکھائے گی مجھے خود رفتگی کچھ اور

ان کی طرف ہے چشم‌ سخن گو دم اخیر

اس کے سوا نہیں اثر زندگی کچھ اور

ہاں اے خیال دوست دکھا دوست کو دکھا

باقی کچھ اور ہے ہوس بندگی کچھ اور

رہتا نہ اتنا دور میں اس جلوہ گاہ سے

اے کاش ابھارتا غم افتادگی کچھ اور

وعدے یوں ہی جو کرتے رہیں گے وہ نو بہ نو

حاصل کروں گا میں طرب زندگی کچھ اور

منظورؔ اک نگاہ طرب سوز کے سوا

دیکھا نہ ہم نے حاصل شرمندگی کچھ اور