lai na saba bu-e-chaman ab ke baras bhi

laa.ī na sabā bu-e-chaman ab ke baras bhī

kuchh soch ke ḳhāmosh haiñ yārān-e-qafas bhī

dastūr-e-mohabbat hī nahīñ jaañ se guzarnā

kar lete haiñ ye kaam kabhī ahl-e-havas bhī

nāzuk haiñ marāhil safar-e-manzil-e-ġham ke

is raah meñ kho jaatī hai āvāz-e-jaras bhī

āzād bhī ho jā.eñge āḳhir tire qaidī

ik roz bikhar jā.egī zanjīr-e-nafas bhī

añgusht-numā shaiḳh-o-barahman ke chalan par

masjid ke manāre bhī haiñ mandir ke kalas bhī

dīvāna abhī tak hai usī dushman-e-jāñ kā

aatā hai dil-e-zār pe ġhussa bhī taras bhī

kuchh aap kā ġham kuchh ġham-e-jāñ kuchh ġham-e-duniyā

dāman meñ mire phuul bhī haiñ ḳhaar bhī ḳhas bhī

chup rah ke bhī mumkin na rahā dard chhupānā

ik sho.ala-e-āvāz hai ab mauj-e-nafas bhī

lai na saba bu-e-chaman ab ke baras bhi

kuchh soch ke KHamosh hain yaran-e-qafas bhi

dastur-e-mohabbat hi nahin jaan se guzarna

kar lete hain ye kaam kabhi ahl-e-hawas bhi

nazuk hain marahil safar-e-manzil-e-gham ke

is rah mein kho jati hai aawaz-e-jaras bhi

aazad bhi ho jaenge aaKHir tere qaidi

ek roz bikhar jaegi zanjir-e-nafas bhi

angusht-numa shaiKH-o-barahman ke chalan par

masjid ke manare bhi hain mandir ke kalas bhi

diwana abhi tak hai usi dushman-e-jaan ka

aata hai dil-e-zar pe ghussa bhi taras bhi

kuchh aap ka gham kuchh gham-e-jaan kuchh gham-e-duniya

daman mein mere phul bhi hain KHar bhi KHas bhi

chup rah ke bhi mumkin na raha dard chhupana

ek shoala-e-awaz hai ab mauj-e-nafas bhi