لاکھ عاشق ہوا کرے کوئی

لاکھ عاشق ہوا کرے کوئی

عشق کا حق ادا کرے کوئی

عشق کی انتہا کرے کوئی

جان ان پر فدا کرے کوئی

جن کے دل میں بسا ہو تو ہی تو

تجھ سے پھر کیا دعا کرے کوئی

کرنے والی تو ذات اسی کی ہے

کیا کسی کا بھلا کرے کوئی

بے رخی سے ملے تو ملنا کیا

عمر بھر تک ملا کرے کوئی

عشق سے دل تو اس کا خالی ہے

لاکھ ذکر خدا کرے کوئی

جو بشر دشمن محبت ہو

منہ نہ اس سے لگا کرے کوئی

بے وفا وہ ہیں یا کہ میں آسیؔ

آج یہ فیصلہ کرے کوئی