lakh ho mazi daman-gir

laakh ho maazī dāman-gīr

mustaqbil kī dekh lakīr

sab se mohabbat karnā siikh

kah ke gayā kal ek faqīr

sab allāh ke bande haiñ

koī nahīñ duniyā meñ haqīr

ahd-e-javānī biit gayā

kar ab jiine kī tadbīr

kohkan ab bhī zinda hai

lā na sakā jo jū-e-shīr

kaise maiñ us ko sher kahūñ

jis meñ na ho koī tāsīr

dilkash haiñ kirdār ye sab

lailā ho shīrīñ yā hiir

apnī qismat aap banā

kyuuñ hai gilā-sanj-e-taqdīr

soz-e-darūñ bhī ne.amat hai

naam usī kā hai iksīr

'soz' ġham-e-jānāñ hī to hai

ahl-e-mohabbat kī jāgīr

lakh ho mazi daman-gir

mustaqbil ki dekh lakir

sab se mohabbat karna sikh

kah ke gaya kal ek faqir

sab allah ke bande hain

koi nahin duniya mein haqir

ahd-e-jawani bit gaya

kar ab jine ki tadbir

kohkan ab bhi zinda hai

la na saka jo ju-e-shir

kaise main us ko sher kahun

jis mein na ho koi tasir

dilkash hain kirdar ye sab

laila ho shirin ya hir

apni qismat aap bana

kyun hai gila-sanj-e-taqdir

soz-e-darun bhi neamat hai

nam usi ka hai iksir

'soz' gham-e-jaanan hi to hai

ahl-e-mohabbat ki jagir