lakh jahan mein jhuTon ki man-mani hai

laakh jahāñ meñ jhūToñ kī man-mānī hai

sachchā.ī kī apnī riit purānī hai

lab par āh-e-musalsal aañkh meñ paanī hai

tanhā.ī kā har lamha nuqsānī hai

shor hamesha rahtā hai is kūche meñ

dil hai yā siine meñ ik zindānī hai

jis ko chāheñ be-izzat kar sakte haiñ

aap baḌe haiñ aap ko ye āsānī hai

kamzoroñ par rahmat ban kar chhā jaao

merā qaul nahīñ hukm-e-rabbānī hai

ham sab un ke dāman se vābasta haiñ

mushkil meñ bhī ham ko ye āsānī hai

tujh ko zamāna mujh se chhīne nā-mumkin

terā merā rishta rūhānī hai

maiñ bhī un ke maddāhoñ meñ shāmil huuñ

is duniyā par merī bhī sultānī hai

dhartī ambar yaarī us kī hai sab se

'mājid' jis ko kahte haiñ sailānī hai

lakh jahan mein jhuTon ki man-mani hai

sachchai ki apni rit purani hai

lab par aah-e-musalsal aankh mein pani hai

tanhai ka har lamha nuqsani hai

shor hamesha rahta hai is kuche mein

dil hai ya sine mein ek zindani hai

jis ko chahen be-izzat kar sakte hain

aap baDe hain aap ko ye aasani hai

kamzoron par rahmat ban kar chha jao

mera qaul nahin hukm-e-rabbani hai

hum sab un ke daman se wabasta hain

mushkil mein bhi hum ko ye aasani hai

tujh ko zamana mujh se chhine na-mumkin

tera mera rishta ruhani hai

main bhi un ke maddahon mein shamil hun

is duniya par meri bhi sultani hai

dharti ambar yari us ki hai sab se

'majid' jis ko kahte hain sailani hai