lakh KHushki khet mein khaliyan mein maujud hai

laakh ḳhushkī khet meñ khaliyān meñ maujūd hai

aas bārish kī dil-e-dahqān meñ maujūd hai

baat sab ke fā.ede kī hai ye kaise maan leñ

jab ki dhamkī aap ke elaan meñ maujūd hai

manzil-e-maqsūd maiñ us kī badaulat pā.ūñgā

ik adad jo hausla sāmān meñ maujūd hai

zikr merī har ġhazal meñ chāhe us kā ho na ho

haañ magar ik do jagah dīvān meñ maujūd hai

fat.h kā elaan mat karnā ai zālim tab talak

jab talak ik jañg-jū maidān meñ maujūd hai

jis kī ḳhātir daar par duniyā chaḌhātī hai hameñ

vo bhī is jashn-e-azīmushshān meñ maujūd hai

aap kī āñkhoñ se 'anjum' ho rahā hai vo ayaañ

jo takabbur aap ke ehsān meñ maujūd hai

lakh KHushki khet mein khaliyan mein maujud hai

aas barish ki dil-e-dahqan mein maujud hai

baat sab ke faede ki hai ye kaise man len

jab ki dhamki aap ke elan mein maujud hai

manzil-e-maqsud main us ki badaulat paunga

ek adad jo hausla saman mein maujud hai

zikr meri har ghazal mein chahe us ka ho na ho

han magar ek do jagah diwan mein maujud hai

fath ka elan mat karna ai zalim tab talak

jab talak ek jang-ju maidan mein maujud hai

jis ki KHatir dar par duniya chaDhati hai hamein

wo bhi is jashn-e-azimushshan mein maujud hai

aap ki aankhon se 'anjum' ho raha hai wo ayan

jo takabbur aap ke ehsan mein maujud hai