لاکھ سیدھا کریں مجھ کو یہ زمانے والے

لاکھ سیدھا کریں مجھ کو یہ زمانے والے

بات یہ ہے کہ مرے بل نہیں جانے والے

دل گرفتہ ہوں بدلتے ہوئے حالات سے میں

تجھ سے ناراض نہیں مجھ کو منانے والے

پہرے داروں کا چلن عام ہوا ہے جب سے

لاپتہ ہونے لگے گھر کے کمانے والے

آخر اک حجرۂ بے در ہی بچے گی دنیا

کیوں سمجھتے نہیں دیوار اٹھانے والے

یہ جو اب ریش و عبایہ میں چھپے بیٹھے ہیں

ہائے کیا لوگ تھے یہ پینے پلانے والے

بے سبب ملنے کی فرصت ہی نہیں ملتی ہے

کام سے ملتے ہیں اب یار پرانے والے