لاکھ طوفاں کے ہوں تیز دھارے

لاکھ طوفاں کے ہوں تیز دھارے

آدمی وہ جو ہمت نہ ہارے

یہ سماں یہ فضا یہ نظارے

عمر رفتہ کو کوئی پکارے

میری منزل پرے آسماں سے

سب مری راہ میں ہیں ستارے

ہے ہر اک چیز انساں کی زد میں

آسمان چاند سورج ستارے

پانے والوں نے منزل بھی پا لی

رہ گئے صرف قسمت کے مارے

غم نہیں مجھ کو کشتی کا لیکن

ڈوب جاتے ہیں اکثر کنارے

اب یہ رشتہ نہیں ٹوٹنے کا

تم ہمارے ہوئے ہم تمہارے

اب تو ویرانیاں ہر جگہ ہیں

کیوں بنوں میں پھروں مارے مارے

کتنی دلچسپ ہے خود فریبی

جیتنے کی تمنا میں ہارے

اس چمن میں نہیں آشیانہ

اپنے ہاتھوں سے جس کو سنوارے

اے تلاطم ادھر اک تھپیڑا

ہیں جو اب تک کنارے کنارے

ہے یہ پیمانۂ ظرف سالکؔ

زندگی مسکرا کر گزارے