lakh tufan ke hon tez dhaare

laakh tūfāñ ke hoñ tez dhāre

aadmī vo jo himmat na haare

ye samāñ ye fazā ye nazāre

umr-e-rafta ko koī pukāre

merī manzil pare āsmāñ se

sab mirī raah meñ haiñ sitāre

hai har ik chiiz insāñ kī zad meñ

āsmān chāñd sūraj sitāre

paane vāloñ ne manzil bhī pā lī

rah ga.e sirf qismat ke maare

ġham nahīñ mujh ko kashtī kā lekin

Duub jaate haiñ aksar kināre

ab ye rishta nahīñ TūTne kā

tum hamāre hue ham tumhāre

ab to vīrāniyāñ har jagah haiñ

kyoñ banoñ meñ phirūñ maare maare

kitnī dilchasp hai ḳhud-farebī

jītne kī tamanna meñ haare

us chaman meñ nahīñ āshiyāna

apne hāthoñ se jis ko sañvāre

ai talātum udhar ik thapeḌā

haiñ jo ab tak kināre kināre

hai ye paimāna-e-zarf 'sālik'

zindagī muskurā kar guzāre

lakh tufan ke hon tez dhaare

aadmi wo jo himmat na haare

ye saman ye faza ye nazare

umr-e-rafta ko koi pukare

meri manzil pare aasman se

sab meri rah mein hain sitare

hai har ek chiz insan ki zad mein

aasman chand suraj sitare

pane walon ne manzil bhi pa li

rah gae sirf qismat ke mare

gham nahin mujh ko kashti ka lekin

Dub jate hain aksar kinare

ab ye rishta nahin TuTne ka

tum hamare hue hum tumhaare

ab to viraniyan har jagah hain

kyon banon mein phirun mare mare

kitni dilchasp hai KHud-farebi

jitne ki tamanna mein haare

us chaman mein nahin aashiyana

apne hathon se jis ko sanware

ai talatum udhar ek thapeDa

hain jo ab tak kinare kinare

hai ye paimana-e-zarf 'salik'

zindagi muskura kar guzare