lakhon hasin mile hain tarahdar ki tarah

lākhoñ hasīñ mile haiñ tarahdār kī tarah

lekin milā na koī mire yaar kī tarah

qātil hai kaun abrū-e-ḳhamdār kī tarah

chubhne meñ tiir kaaT meñ talvār kī tarah

hai dā.era hayāt kā zanjīr kī misāl

gardish meñ log rahte haiñ parkār kī tarah

manzil kī samt kyoñ na uThe shauq kā qadam

hamrāh dil hai qāfila-sālār kī tarah

majmūa-e-tazād huī un kī guftugū

iqrār bhī vo karte haiñ inkār kī tarah

ham vahshiyoñ kā haal jo vo dekhne chale

sahrā bhī ho gayā hai chaman-zār kī tarah

dasht-e-junūñ meñ ābla-pā ko sukūñ kahāñ

farsh-e-zamīñ hai bistar-e-sūfār kī tarah

va.ada jo kar rahe haiñ to puurā bhī kījiye

dhokā na dījiye mujhe har baar kī tarah

vo paikar-e-jamāl sarāpā nazāra thā

apnī ḳhudī hijāb thī dīvār kī tarah

lakhon hasin mile hain tarahdar ki tarah

lekin mila na koi mere yar ki tarah

qatil hai kaun abru-e-KHamdar ki tarah

chubhne mein tir kaT mein talwar ki tarah

hai daera hayat ka zanjir ki misal

gardish mein log rahte hain parkar ki tarah

manzil ki samt kyon na uThe shauq ka qadam

hamrah dil hai qafila-salar ki tarah

majmua-e-tazad hui un ki guftugu

iqrar bhi wo karte hain inkar ki tarah

hum wahshiyon ka haal jo wo dekhne chale

sahra bhi ho gaya hai chaman-zar ki tarah

dasht-e-junun mein aabla-pa ko sukun kahan

farsh-e-zamin hai bistar-e-sufar ki tarah

wada jo kar rahe hain to pura bhi kijiye

dhoka na dijiye mujhe har bar ki tarah

wo paikar-e-jamal sarapa nazara tha

apni KHudi hijab thi diwar ki tarah